Velkommen!

Ulvesund Fyr ligg på Hjertenes nær Måløy, i Vågsøy kommune i ytre Nordfjord. Ulvesund Fyr har vore eit lyspunkt for dei sjøfarande sidan 1870. Vi ønsker at det skal vere eit lyspunkt i kvardagen for våre gjester.

Fyret er eitt av fire fyr som viser båtane trygt rundt Stadt, som er det verste havstykket i Norge. Ulvesund Fyr er eigd av Kystverket Vest og drivast av Sølvi Hopland Aemmer og Heinz Aemmer.

Fyrferie for heile familien.

Ulvesund Fyr ligg lunt og stille til inne i Ulvesundet, omgitt av ein solrik hage som bugnar av blomar og bær. Her har ein full oversikt over båttrafikken og det skiftande lyset i Sildagapet, og kan nyte fargerike og fredfulle solnedgangar. Dei to fyrgeitene i hagen set pris på klapp og kos. I den sjarmerande vesle fyrbutikken kan våre gjester kjøpe heimelage saft, gelé, handarbeid og musikk, og bøker, glaskunst, kaffe, te, sjokolade og gammaldagse drops i lausvekt. Her kan det også bestillast heimelaga mat og nykverna kaffe som blir servert i vår fyrkafé, eller ute i fyrhagen.

Ulvesund Fyr